| title | excerpt | thumb | tags | |
|---|---|---|---|---|
nimi ale kepeken toki pona |
mi pana e lipu sona pi nimi ale kepeken toki pona taso. mi wile sona e ni: mi ken ala ken pana e sona tawa nimi ale kepeken nasin ni? |
|
tenpo suno pini la mi wile pali e lipu sona pi nimi ale kepeken toki pona. mi wile sona e ni: ona li ken ala ken pana e sona tawa nimi pi toki pona kepeken toki pona taso? ona li ken pana e sona tawa nimi ale kepeken nasin ni anu seme?
ni li pali open. tenpo kama la mi ante mute lon lipu ni. sina ken pana e sona kin.
a : a li nimi kute li nimi pilin. nimi a li pana e sona ni: ona li pilin pona la, ona li ken pana e kute a !
akesi : akesi en kala en pipi en soweli en waso la, akesi li lon kulupu ni. akesi li lon seli suno la, ona li kama wawa. akesi pi sijelo linja li lon. akesi ni li jo e noka ala.
ala : sina jo e kili wan. sina moku ale e kili. kili ala li lon.
alasa : ona li lukin li wile kama jo la, ona li alasa.
ale : kili tu li lon la, sina jo e kili tu la, sina jo e kili ale.
anpa : ijo anpa li ma li telo li supa. kon li anpa ala. sewi la, anpa ale li ante.
ante : ijo tu li sama ala la, ijo wan en ijo tu li ante.
anu : nimi anu li nimi taso. nimi anu li pana e sona ni: mi pana e ijo tu. mi toki e ni: ijo wan anu ijo ante? sina pilin e ijo wan taso.
awen : ona li tawa ala li weka ala la, ona li awen.
e : nimi e li nimi taso. nimi e li pana e sona ni: nimi lawa en nimi pali en nimi ijo la, kulupu nimi li ken jo e kulupu tu wan ni. kulupu pali en kulupu ijo la, nimi e li tu e kulupu tu ni. (ona li kipisi e kulupu tu.)
en : nimi en li nimi taso. nimi en li pana e sona ni: mi pana e ijo tu. mi toki e ni: ijo wan en ijo ante. sina pilin e ijo ale.
esun : esun li tomo. ijo li lon tomo. ona li kama lon tomo la, ona li ken pana e mani li ken kama jo e ijo.
ijo : ijo li ken moli li ken moli ala. kepeken luka la, sina ken pilin e ijo mute. ijo ante li tawa lukin taso anu tawa kute taso. sina ken pana e nimi ni tawa ona la, ona li ijo.
ike : ijo jaki en ijo utala li ike. ona li pilin pona ala la, ona li pilin ike.
ilo : ilo li ijo. kepeken ijo lon luka la, ona li ken pali. jan li kepeken ilo. soweli pi sona mute li ken kepeken ilo kin.
insa : sijelo ijo li len e insa. ona li tu e ijo la, ona li lukin e insa. ona li pana e ijo lon poki la, ijo li lon insa poki.
jaki : moku anu ko li lon len sina la, ni li jaki. moku li lukin ike la, ni li jaki.
jan : jan li soweli pi sona mute. mi en sina li jan.
jelo : jelo li lon kulupu kule. suno en kasi kule li kule laso.
jo : ijo li lon luka ona la, ona li jo e ijo.
kala : akesi en kala en pipi en soweli en waso la, kala li lon kulupu ni. kala ale li lon telo.
kalama : ona li kute e ijo la, ni li kalama.
kama : ona li lon ala la, ona li lon la, ona li kama.
kasi : kasi li tan ma. soweli li moku e kasi. ma li jo ala e kasi la, ma li moli.
ken : ijo lon en ijo kama li ijo ken. kon pi nimi ken li ni: ona li wile e ijo. ona li kama jo e ijo. ona li ken kama jo e ijo.
kepeken : kama jo e ijo li wile e ijo ante la, ona li kepeken e ijo ante tawa kama jo.
kili : kasi li pana e kili tan ni: kasi sin li kama. kili li moku tawa soweli.
kin : kin li lon ala pu. nimi kin li nimi taso. kon pi nimi kin li ni: ona li toki e ijo kin la, ona li ken suli e pilin tawa ijo.
kipisi : kipisi li lon ala pu. nimi tu la, ona li sama lili. ona li kipisi e ijo la, ona li kama jo e ijo tu.
kiwen : ijo mute lon insa ma li kiwen. kon la, kiwen ale li ante.
ko : sina sike e telo e ma la, ona li kama ko. ijo telo la, ijo ko li kiwen. ijo kiwen la, ijo ko li telo.
kon : kon li lon sewi ma. nena en uta la, jan li ken pana e kon tawa insa tan lupa ni. sin la, kon ijo li sona ale pi ijo ni.
kule : laso en loje en walo en pimeja en jelo la, ona ale li kulupu kule.
kulupu : ijo tu anu mute li lon poka la, ijo li kulupu.
kute : jan lawa li jo e lupa kute tu. jan li sona e kalama kepeken kute. jan li kute e kalama.
la : nimi la li nimi taso. nimi la li pana e sona ni: ijo tu li kama tan ijo wan. ona ken toki e ni: ijo wan la, ijo tu li lon.
lape : ona li pini e oko la ona li ken lape. ona li sona ala e ijo lon la, ona li lape.
laso : laso li lon kulupu kule. kasi en telo li kule laso.
lawa : lawa pi sijelo jan li lon sewi. oko en kute en uta en nena ala li lon lawa. ona li lawa e ijo la, ona li kepeken e ijo sama sijelo ona.
leko : leko li lon ala pu. ona li sike pi sinpin tu tu anu sijelo pi sinpin luka wan.
len : len li lipu jan. jan li pana e len lon selo la, ona ken toki e ni: jan li len. jan li len la, jan li pilin seli ike ala li pilin lete ike ala.
lete : suno li weka la, ma li kama lete. telo li lete la, ona li kiwen. seli la, lete ale li ante.
li : nimi li li nimi taso. nimi li li pana e sona ni: nimi lawa en nimi pali la, kulupu nimi li ken jo e kulupu tu ni. nimi li li tu e kulupu tu ni. (ona li kipisi e kulupu tu.)
lili : soweli la, pipi li lili. kulupu pipi la, kulupu soweli li lili. suli la, lili ale li ante. mute la, lili ale li ante.
linja : sitelen la, ona li pana e linja lon lipu. tawa la, ona li pana e linja lon ma.
lipu : selo ijo li insa ala la, ona li lipu.
loje : loje li lon kulupu kule. seli en kili li kule loje.
lon : ona li pana e ijo wan tawa ijo tu la, ijo wan li lon ijo tu. weka la, lon ale li ante.
luka : noka sewi tu pi soweli sama jan li luka. kepeken ilo la, jan li kepeken luka. nanpa luka li sama nanpa pi palisa lili lon luka jan.
lukin : pu la oko en lukin li sama ale. toki jan la, ona li lukin kepeken oko.
lupa : lupa li sike weka tan sinpin. sinpin tomo li jo e lupa. kepeken lupa suli la, ona li ken tawa insa. kepeken lupa lili la, ona li ken lukin lon insa tomo.
ma : ma li supa lon anpa kon. jan ale li kama tan ma. jan li tawa lon ma. ma li pakala la, jan ale li moli.
mama : ona li pana e ijo pona la, ona li mama.
mani : mani li ijo tawa kama jo e ijo ante. jan li pilin mani li ale la, sona jan li pakala. mani li ken ala pana e pilin pona.
meli : meli en mije en tonsi la, meli li lon kulupu ni. jan ante li pilin ante tawa kon meli.
mi : tawa mi la, mi ale li lon insa mi. tawa sina la, sina ale li nimi mi. ni li nasin jan.
mije : meli en mije en tonsi la, mije li lon kulupu ni. jan ante li pilin ante tawa kon mije.
moku : soweli li pana e moku lon insa ona la, ona li kama jo e wawa. soweli li moku ala la, ona li moli.
moli : tenpo ni la ona li lon. tenpo kama la ona li lon ala. ni li moli.
monsi : sijelo selo jan li jo e poka tu. monsi li ni wan. sina ken ala lukin e monsi sina.
monsuta : monsuta li lon ala pu. akesi en kala en pipi en soweli en waso la, monsuta li sama lili kulupu ni. taso monsuta li lon ala, li ijo utala pi sona jan.
mu : soweli li pana e kalama la, ni li mu.
mun : mun li lon sewi. tenpo pimeja la, mun li sike suli lon kon sewi. ona li sike e ma ale.
musi : jan li jo ala e ijo musi la ona li moli ala. taso musi li lon ala la, nasin lon li ike. sin la, jan en soweli li musi tan ni: musi li pana e sona.
mute : ijo mute li ijo pi nanpa suli. pali mute li pali pi tenpo suli.
namako : pu la, namako en sin li sama ale. toki jan la, namako li ko moku kin.
nanpa : nimi nanpa li nimi jan. kon nanpa li ni: kulupu ijo li lili anu mute.
nasa : ijo pi sona musi li nasa. ijo pi sona pakala li nasa. ijo pi sona lili li nasa.
nasin : ona li tawa kepeken nasin. ona li kama sona kepeken nasin. ona li lon kepeken nasin.
nena : nena jan li lon lawa li ken pilin kon. ijo lukin sama nena jan li nena kin.
ni : ona li wile toki e ijo la, ona li nimi e ijo kepeken nimi ni.
nimi : toki la, nimi li ijo lili wan. kulupu nimi li pana e sona tawa ale.
noka : jan li tawa kepeken noka tu. soweli li jo e noka tu tu.
o : o li nimi taso. kon o li ni: jan li lon ala la, ona li wile jan li kama lon la, ona li toki e ni: jan o! ona li wile jan li pali e ijo la, ona li toki e ni: o pali e ijo!
oko : pu la oko en lukin li sama ale. toki jan la, oko li sike tu lon insa lawa jan.
olin : soweli li lukin e oko pi soweli ante la, pilin suli li ken kama lon. pilin ni li olin.
ona : mi en sina li toki e ijo. mi en sina li pana e nimi ona tawa ijo.
open : ijo li open la, ona li ken lukin insa, li ken tawa insa. pini la, open ale li ante.
pakala : ona li lawa pona e ijo li ken ala kepeken e ijo la, ijo ni li pakala.
pali : ona li pana e wawa ona tawa ijo la ijo li kama pona. ni li pali.
palisa : palisa li linja kiwen. ilo en kasi li ken jo e selo palisa.
pan : pan li lon kulupu pi moku jan. kasi en kon en seli la, pan li kama tan ni.
pana : pana li pali pi tawa ijo. mi jo e ijo la sina kama jo e ijo tan ni: mi pana e ijo.
pi : pi li nimi taso. nimi pi li pana e sona ni: kulupu nimi tu li ante e kulupu nimi wan. nimi pi li tu kulupu tu ni. (ona li kipisi e kulupu tu.)
pilin : sona la, pilin li sama lili. sona olin li pilin. ona li ken pilin kepeken lawa. ona li ken pilin kepeken luka.
pimeja : pimeja li lon kulupu kule. suno li lon ala la, ni li kule pimeja.
pini : ijo li pini la, ona li ken ala tawa insa, li ken ala ante e ijo ni. open la pini ale li ante.
pipi : akesi en kala en pipi en soweli en waso la, pipi li lon kulupu ni. pipi li jo e noka mute. pipi li ken lon kulupu mute. pipi lili li ken kama lon lukin ante mute e pipi suli.
poka : ijo tu li lon poki la, ona li lon poka. ijo li lon tomo la, ijo ante li lon tomo ala la, ona tu li lon poka ala.
poki : jan li ken kepeken ijo lon insa poki.
pona : ike la, pona ale li ante.
pu : jan Sonja li pana e lipu pi kama sona e toki pona. ona li lukin e lipu ni la, ona li pu.
sama : jan lili tu li kama tan mama wan la, ona li sama. kili tu li kama tan kasi wan la, ona li sama. ante la sama ale li ante.
seli : suno li pana e wawa seli. soweli ale la, jan taso li kepeken e ilo seli. lete la, sewi ale li ante.
selo : sijelo ijo li jo e insa la, sijelo insa ala li selo. ona li pilin e ijo kepeken luka la, ona li pilin e selo.
seme : seme li nimi taso. nimi seme li pana e sona ni: one li wile sona e ijo la, ona li kepeken e seme lon kulupu nimi. kulupu nimi la, nimi pi sona ala li kama seme.
sewi : ijo sewi li kon li mun li suno li ma ala. anpa la, sewi ale li ante.
sijelo : ona ken pilin e ijo la, ijo li jo e sijelo. kon la, sijelo ale li ante.
sike : one li tawa sike la, ona li kama sin. sijelo sike la, sinpin ale li sama.
sin : ona li jo e ijo wan. tenpo kama la one li jo e ijo tu. ijo tu li sin.
sina : tawa mi la, sina ale li lon insa sina. tawa sina la, ale mi li nimi sina. ni li nasin jan.
sinpin : oko en uta li lon sinpin jan. lupa li lon sinpin tomo. supa la, sinpin ale li ante.
sitelen : toki lon lipu li sitelen. musi lon lipu li sitelen.
sona : pilin la, sona li sama lili. ona li pilin mute tawa ijo la, ona li kama sona e ijo. ona li lawa e ijo la, ona li sona e ijo.
soweli : akesi en kala en pipi en soweli en waso la, soweli li lon kulupu ni. soweli li jo e sijelo linja. soweli lili li kama lon lukin sama soweli suli. jan li lon kulupu soweli.
suli : jan lili li moku mute la, ona li ken kama suli. sona li lawa e jan la, sona ni li suli. lili la, suli ale li ante.
suno : ma li sike e suno. suno li lon sewi. suno li weka e pimeja lon ma.
supa : sina li pali ala la, sina ken lon supa. sinpin la, supa ale li ante.
suwi : moku li pona la, ona li suwi. jan lili li pona la, ona li suwi.
tan : ona li lon tomo wan la, ona li tawa tomo tu la, ona li tan tomo wan.
taso : sona pi nimi taso li ni: ona li jo e ijo wan li jo ala e ijo ante la, ona li jo e ijo wan taso.
tawa : mi lon ma wan la mi tawa ma tu la, mi tan ma wan. ijo la, mi wile pali la, mi wile pali tan ijo ni.
telo : tenpo soweli open la, soweli ale li lon telo. telo ala la, ale li moli.
tenpo : ijo li lon li tawa ala. taso mi sona e ni: ona li ante. ni li tenpo.
toki : jan li pana e sona kepeken kalama la, ni li toki.
tomo : ona li lon insa e ijo la, ni li tomo.
tonsi : meli en mije en tonsi la, tonsi li lon kulupu ni. jan ante li pilin ante tawa kon tonsi.
tu : wan en wan li tu. ona li tu e ijo la, ona li kama jo e ijo tu.
unpa : jan lili li kama tan ni.
uta : lawa jan li jo e lupa uta. kepeken uta la, ona li ken moku.
utala : kulupu soweli tu li wile e ijo wan la, ona li utala. kulupu jan tu li wile e ijo wan li tu e ijo tawa ijo sama tu la, ni li utala ala.
walo : walo li lon kulupu kule. telo lete en kon li kule walo.
wan : ijo tu li kulupu la, ona li wan.
waso : akesi en kala en pipi en soweli en waso la, waso li lon kulupu ni. waso li jo e noka tu. ona li ken tawa sewi. waso lili li kama lon tan sike waso.
wawa : wawa li tawa e ijo li seli e ijo.
weka : ona li moku e kili ale la, ona li weka e kili. ijo li lon la, ijo li ken weka.
wile : ona li alasa e ijo la, ona li wile e ijo. jo ala e ijo la, ona li moli la, ona li wile e ijo ni.